Os tres tenores da cociña galega

Xosé Torres Cannas fixo de anfitrión no seu restaurante ‘Pepe Vieira’ e Marcelo Tejedor acodiu de invitado. Para que? Pois para mostrar o seu apoio a Pepe Solla, cociñeiro de ‘Casa Solla’, que é un dos 8 finalistas do prestixioso premio ‘Chef Millesime by Cruzcampo Gran Reserva’ que se resolverá o vindeiro 28 de maio en Madrid. Os tres tenores da cociña galega xuntáronse o pasado xoves día 8 de marzo en Poio para ofrecer un almorzo cun menú deses no que o produto de Galicia é o protagonista indiscutible: sardiña galega afumada sobre torrixa de ceviche e guacamole; steak tartar de vaca galega e parmesán de Arzúa; empanada tradicional de guiso de choco; merluza de Celeiro ao vapor e caldo de pementos verdes; e lamprea do Miño guisada en souson con follas de borralla e piñóns entre outras cousas. Cociña con identidade galega.